Sunday, May 7, 2017

අසෝක අධිරාජයාට එරෙහිව කලු කොඩි ඔසවන්නට සැලසුමක්. ටයිම් මැෂින් එකක් සොයති

ශ්‍රී ලංකාවේ එක්තරා දේශපාලන පක්ෂයක පිරිසක් මේ දිනවල ටයිම් මැෂින් එකක් සෑදීමේ විශාල උත්සාහයක යෙදෙමින් සිටින බව රත්නදීප Chronicle වෙත වාර්තා වේ.

මීට හේතු වී ඇත්තේ ඔවුනගේ දැඩි ඉන්දියානු විරෝධය බව සඳහන් වේ.



විශ්වාස කටයුතු ආරංචි මාර්ග අනුව කිසිදු ඉන්දියානුවකු සම්බන්ධ නොවන පර්යේෂණ කණ්ඩායමක් විසින් නිපදවූ ටයිම් මැෂින් එකක් අනිවාර්ය වන බව ඔවුන් පවසා තිබේ.

ඔවුනගේ ඒකායන බලාපොරොත්තුව අශෝක අධිරාජයාට එරෙහිව කලු කොඩි එසවීම බව විශ්වාස කටයුතු ආරංචි මාර්ග පවසයි.

වාර්තා වන අන්දමට ඉන්දීය අගමැති නරේන්ද්‍ර මෝදි මහතාගේ ලංකා ගමන සිදුවන අවස්ථාවේ ඔවුන් පෙරහුරුවක් පවත්වන්නට යන බව සඳහන් ය​. වෙසක් දිනය සැමරීමට වුවද මෝදි පැමිණෙන්නේ ඉන්දියාවෙන් බැවින් මෙම විරෝධතාව මතු වී ඇත​.

මෝදි එට්කා හරහා ලංකාව යට කරන්නට යන බව ඔවුනගේ අදහසයි.

මේ ආකාරයෙන්ම අසෝක අධිරාජයා ද බුද්ධාගම හරහා ලංකාව යට කළ හෙයින්, මිහිඳු රහතන්වහන්සේ මිහින්තලයට වැඩම කරද්දී කලු කොඩි එසවීමේ අදහස ඇතිව මෝදි පැමිණෙද්දී කලු කොඩි ඔසවන්නට මෙම පිරිස බලාපොරොත්තු වේ.

මෝදිට එරෙහිව කරන කලු කොඩි එසවීමෙන් පන්නරය ලද පසු ටයිම් මැෂින් එකකින් අනාගතයට ගොස් අසෝකට එරෙහිව කොඩි එසවීමට මෙම පිරිස සැලසුම් කරගෙන සිටිති.

Saturday, January 21, 2017

ලංකාවේ සිනමාව ඉතාම උසස් තැනක තියෙනවා - විශේෂ සම්මුඛ සාකච්ඡාව​

සිංහල සිනමාවට වසර 70 ක් පිරෙන අවස්ථාවේ ආපසු හැරී බලන විට සිංහල සිනමාව තිබෙන තැන ගැන පැහැදිලි ලෙසම සතුටු විය යුතු බව ප්‍රවීණ සිනාමා විචාරක මහතකු රත්නදීප​ Chronicle සමඟ සඳහන් කළේය​.

කෙසේ නමුත් සිය නම හෙළි නොකරන ලෙස ඔහු ඉල්ලා සිටි අතර​, පත්තර සහ ටීවී චැනල් සමඟ ඔහු මීට වඩා හාත්පසින් වෙනස් දෙයක් කී බව ද හෙළි කළේය​.

ඒවායේ වාර්තාකරුවන් ඔහුගෙන් මේ පිළිබඳ ඇසූ කළ සිංහල සිනමාව කඩා වැටී ඇති බැව් ප්‍රකාශ කළ බව ඔහු කියා සිටියේය​.

විචාරකයන් තුළින් ඊට වඩා දෙයක් බලාපොරොත්තු නොවන බව ඔහු ඒ සමඟම කියා සිටියේය​.

"ඔය ඇත්ත කතාව කීවොත් මල්ලි, පත්තර මල්ලිලා ආයෙ අපි හොයාගෙන එන්නෙත් නෑ" ඔහු කියා සිටියේය​.

සිංහල සිනමාව අද පත්ව ඇති ස්ථානය ඉතා යහපත් වන බව ඔහුගේ මතයයි.

සිංහල සිනමාව විවිධ යුග පසු කළ බව ඔහු පෙන්වා දුන්නේය​. මුලින් "කොපි කැට්" සිනමාව කොහෙන් හෝ එන කතාවක් කොපි කිරීම මත පදනම් වූ බවත් ලෙස්ටර් ජේම්ස් පීරිස් මහතාගෙන් පසු ස්වයීය නිර්මාණ සොයා යන නියම සිංහල සිනමාවක් බිහි වූ බවත් ඔහු පෙන්වා දෙයි.



කෙසේ නමුත් විවෘත ආර්ථිකය පැමිණීමෙන් පසු යළි සිනමාවේ පරිවර්තනයක් ලෙස එම කලාව​ කඩා වැටුණ අතර ඉන්පසු "ඇගේ වෛරය​" මොඩල් එකට සිනමා කලාව ළඟා වූ බව ඔහු පෙන්වා දුන්නේය​.

"දැන් මෙහෙමයි. ඔය ටයිප් එකේ සිනමා නිර්මාණ ඇමරිකාවෙ හැදුණෙ 1960 - 70 ගණන්වල​. ඉතින් අවුරුදු 30 කින් ලංකාවට ඒක ආවා. ඒකත් නරකම නැහැ" ඔහු කියා සිටියේය​.

පසු කාලීනව පොඩි උන් විකිණීමේ සිනමාව පැමිණි බවත් එය කොහෙන් ආවාදැයි සිතාගත නොහැකි බවත් ඔහු කියයි.

"ඇමරිකාවේ පොඩි උන් විකිණීමේ සිනමාව ආවෙ "හෝම් අලෝන්" වගේ එව්වයෙන්. ලංකාවෙ පොඩි උන් විකිණීමේ සිනමාවල් දැක්කට පස්සෙ ළමයෙක් විහිලුවකටවත් ගෙදර තනියෙන් තියල යන්න බයයි. කලාකාරයොත් මෙච්චර අසහනකාරයෝ නම් ඉතින් අනික් උන් ගැන කවර කතා ද​? ඔහු කියයි.

මේ කාළයේ බිහිවූ අනෙක් සිනමා "සම්මාන සිනමා" බවත් ලංකාවේ ආදායම් ලැබුවත් නැතත් ජාත්‍යන්තර සම්මාන බලාගෙන තැනුණ ඒවා බවත් ඔහු කියයි.

ඔහුගේ අදහස නම් ළමයින් විකුණාගෙන සිනමාව කරන කාලකණ්ණි සමයක සිට රජුන් විකුණාගෙන කන සමයකට පැමිණීම සාධනීය කරුණක් බවයි.

"අනික සිංහල සිනමාව ගැන කතා කරද්දි අපි බලන්න ඕන රසිකයා පැත්තෙන්. මිනිස්සු තවමත් රසඥතාවයෙන් ඉහළයි. ඒකනෙ සිංහල චිත්‍රපටි බලන්න මොකෙක්වත් යන්නෙ නැතත් අලුත්ම ඉංග්‍රීසි චිත්‍රපටි හොලිවුඩ්වල රිලීස් වෙද්දි මෙහෙ ඩවුන්ලෝඩ් කරගෙන බලන්නෙ. තරුණ පරපුරේ රසඥතාව හොඳයි" ඔහු තර්ක කරයි.

Tuesday, January 3, 2017

සීමා නීර්ණ ගිනස් වාර්තාව ලංකාවෙන්

ශ්‍රී ලංකාවේ සීමා නීර්ණ ක්‍රියාවලිය ගිනස් පොතට ඇතුලත් කිරීම සඳහා කටයුතු සම්පාදනය කරමින් සිටින බව විශ්වාස කටයුතු ආරංචි මාර්ග රත්නදීප Chronicle වෙත පැවසීය​.

අදාළ ඇමතිවරයා විසින් එම අභියාචන වාර්තාව පිළි නොගැනීමට හේතු වූයේ ද එසේ ගිනස් වාර්තාව පිළිබඳ බලාපොරොත්තු පළ වී තිබීම නිසා බව ද සඳහන් ය​.



මේ අනුව සීමා නීර්ණ කටයුත්තක් සඳහා වැඩිම කාළයක් ගිය රට ලෙස වාර්තා තැබීමට ශ්‍රී ලංකාව සූදානම් ය​.

මෙවන් වාර්තාවක් ගිනස් පොතේ නැති නමුත් එය ගිනස් පොතට ඇතුලු කරන ලෙස ගිනස් කමිටුවෙන් ඉල්ලීමට යහපාලන රජය සූදානම් වේ.

මේ පිළිබඳ අගමැතිවරයා විශේෂ අවධානයක් නොදක්වන්නේ වුවද ජනාධිපතිවරයා ඒ පිළිබඳව අති විශේෂ අවධානය යොමු කර ඇතැයි ද වාර්තා වේ.

යහපාලන රජය විවිධ නව වචන සිංහල වාග් මාලාවට එක් කළ බව මතක් කළ රජයේ ප්‍රකාශකයෙක්, අලුතින්ම ගිනස් වාර්තාවක් නිර්මාණය කිරීම ලොකු අපහසුතාවකින් යුතු නොවන කටයුත්තක් බව ප්‍රකාශ කළේය​.

මේ අතර ලෝකයේ වැඩිම මිලෙන් යුතු සාමාන්‍ය සිගරට්, ලොව වැඩිම මිලෙන් යුතු සාමාන්‍ය අරක්කු, ලොව වැඩිම මිලෙන් යුතු කෑම පැකට් යනාදිය ඇති රට වශයෙන් ද විවිධ ගිනස් වාර්තා රැසක් තැබීමට යහපාලන රජය සූදානමින් සිටින බව විශ්වාස කටයුතු ආරංචි මාර්ග රත්නදීප Chronicle වෙත සඳහන් කළේය​.

Sunday, December 4, 2016

තිසරපටය ගැන සාකච්ඡා කිරීමට ජනපතිගෙන් එන්රික්ට ඇරයුමක්

පසුගිය දිනවල ඇතිවූ යම් යම් මතභේද පිළිබඳ තමන් සමඟ සාකච්ඡාවකට එන ලෙස ජනාධිපති මෛත්‍රිපාල සිරිසේන ප්‍රකට ගායක එන්රික් ඉග්ලේසියාස්ට ආරාධනා කර ඇති බව රජයේ ආරංචි මාර්ග සඳහන් කරයි.

කොළඹදී මීට මාස කිහිපයකට පෙර පැවති සංගීත ප්‍රසංගයකදී ඉග්ලේසියාස් වෙත ප්‍රේක්ෂකයින් අතර හුන් තරුණියක බ්‍රෙසියරයක් නොහොත් තිසරපටයක් විසිකිරීම මහත් වූ කතාබහකට ලක් විය​.

ජනාධිපති සිරිසේන කියා සිටියේ රටේ සංස්කෘතියට හානි කරන සන් දර්ශන සංවිධානය කරන්නන්ට මඩුවලිගයෙන් තැලිය යුතු බවයි. මෙම ප්‍රකාශය කරන විට ඉග්ලේසියාස් රටෙහි සිටියේ නැත​.

ඉග්ලේසියාස් ගිය පසු සනී ලියෝන් ආදී ඉන්දියානු නිළියන් සහ නාට්‍යාංගනාවන් ලංකාවේ රාත්‍රී සමාජ ශාලාවකවත් සන්දර්ශනයකට පැමිණෙන්නට බිය වූ බව තතු දත්තො පවසති. කෙසේ නමුත් සංස්කෘතියට හානි කළ බවට සැක කෙරෙන එවන් සමාජ ශාලාවකට මෑතදී ප්‍රහාරයක් එල්ල වූ අතර එයට ජනාධිපතිගේ පුත්‍රයාගේ කිසිදු සම්බන්ධයක් නැත​.

කෙසේ වෙතත්, ඊයේ පෞද්ගලික බස් වර්ජකයන් හා සාකච්ඡා කර ඔවුනගේ ඉල්ලීම් ලබා දුන් පසු ජනාධිපතිවරයා ප්‍රවාහන අමාත්‍යාංශයේ උපදේශක තනතුරක් ඔවුනට ලබා දීම කෙරෙහි අවධානය යොමු කර ඇත​.

එමෙන්ම​, සිය අගමැතිවරයාගේ ලිච්ඡවී ප්‍රතිපත්තිය අනුව යමින් සාකච්ඡා මාර්ගයෙන් සියල්ල විසඳීම කෙරෙහි ඔහු දැන් යොමු වී ඇත​. බස් හා ත්‍රීවීලර් වර්ජකයින් මහාමාර්ග සහ දුම් රිය මාර්ග හරස් කරද්දී පවා ඔවුනට පහර දී එලවා නොදමා ගොඩින් වැඩේ බේරාගන්නට රජය යොමු ව ඇත්තේ එම ලිච්ඡවී ප්‍රතිපත්ති අනුව යමිනි.

නමුත් තමාගේ ලිච්ඡවී ප්‍රතිපත්තියෙන් අනවශ්‍ය ප්‍රයෝජන ගන්නට උත්සාහ කරන ශ්‍රී ලංකා පොදුජන පොහොට්ටුවේ නියෝජිතයන්ට නම් කිසිදු සමාවක් නැති බව සිරිසේන මහතා සපථ කර සිටී.

එම පක්ෂයට ඇති ප්‍රශ්න ජාතික ප්‍රශ්න නොවන නිසා ඒ පිළිබඳ සාකච්ඡා නොකරන බව පවසන රජය​, බ්‍රෙසියර් ප්‍රශ්නය ජාතික ප්‍රශ්නයක් බැවින් ඒ ගැන ඉග්ලේසියාස් සමඟ සාකච්ඡා කරන බව කියා සිටී.

එම ප්‍රශ්නය විසඳීම සඳහා ප්‍රවාහන ඇමතිතුමාගේ ප්‍රධානත්වයෙන් කොමිටියක් පත් කරන බව සැළ ය​.

තවද​, මින් මනත බ්‍රෙසියර් විසි නොකරන තත්ත්වයට තරුණියන් පත් කළ යුතු බව රජයේ ඇතැම් කොට්ඨාශවල අදහස වී ඇත​. ඒ අනුව ඉග්ලේසියාස් යලිත් ලංකාවේ ප්‍රසංසයක් පැවැත්වුවහොත් එහි එන තරුණියන්ට තිසරපට තහනම් කිරීම කෙරෙහි රජයේ අංශවල අවධානය යොමු වී ඇත​.

Saturday, December 3, 2016

බස් වර්ජනය පිළිබඳ ජනපතිතුමා ජාතිය අමතා කරන කතාව​

ගරුතර මහා සංඝරත්නයෙන් අවසර​. අන්‍යාගමික පූජකතුමනි, ආදරණීය අම්මේ, තාත්තේ, සහෝදරයා, සහෝදරිය​...

අපි ජනවාරි 8 වෙනිදා විප්ලවය කළේ ජනතාවට හොඳින් ජීවත් වෙන්න පරිසරයක් හදලා දෙන්න මිසක් ජනතාව තවත් දුක් විඳිනවා බලන්න නෙවෙයි. ඒ කාළෙ අපිට මතකයි, ජනතාවට ජීවන බර වැඩි කරලා රටේ ජනාධිපති සහ එයාගෙ පවුලෙ උදවිය වෙඩි නොවදින කාර් ගෙනාවා, හෙලිකොප්ටර් ටුවර් ගියා, ශ්‍රී ලංකන එක කාබාසිනියා කරල ගෑණු එක්ක රවුම් ගැහුවා, කාර් රේස් පැද්දා... ඒ අතීතය අපිට අමතක කරන්න බැහැ.

ඒ නිසා තමයි මම පොදු ජනතාවගේ ආහාරයක් වෙච්ච ආප්ප කාළා අනික් පැත්තට පැන්නෙ. මම එදා බුරියානි හරි ෆ්‍රයිඩ් රයිස් හරි ඩෙවල් චිකන් හරි ඩිනර් එකට තිබ්බා නං හිටං කීයටවත් අනික් පැත්තට පනින්නේ නෑ. ඒ ආණ් ඩුවෙ ඉද්දි මගේ අවසන් රාත්‍රී භෝජන සංග්‍රහයෙදි පවා මම හිතුවෙ ජනතාව ගැන​.
අපි ජනවාරි 8 වෙනිදා විප්ලවය කළේ ජනතාවට හොඳින් ජීවත් වෙන්න පරිසරයක් හදලා දෙන්න මිසක් ජනතාව තවත් දුක් විඳිනවා බලන්න නෙවෙයි.

ඒ කාළෙ මට මතකයි, මිනිස්සුන්ට කිසිම අයිතිවාසිකමක් තිබ්බෙ නෑ. වැඩ වර්ජනය කළොත් කණට ගහන සංස්කෘතියක් හදල තිබ්බෙ. වෙන වෙන දේවලුත් කළා ලු. ඒ ගැන නම් මට අවබෝධයක් නෑ. ගුටි කන්න බැරි නිසා තමා කම්බස්... සමාවෙන්න​... බස් ගැමුණු මගේ ඡන්ද ව්‍යාපාරයට බැහැල වැඩ කළේ. මට එව්වා අමතක නෑ. ඒ කැපවීම අපි අගය කරන්න ඕන​.

ඒ නිසා තමයි මම ගැමුණු කියන දේ කරන්නෙත්, ගැමුණු මම කියන දේ කරන්නෙත්. ඉස්සර රජයේ හිටපු රාජ්‍ය නායකයා කළෙත් කැළණියෙ ගැමුණු කරපු දේ තමයි. නමුත් ඒ ඒකාධිපති රටක්. අපි හදන්න යන්නේ ප්‍රජාතන්ත්‍රවාදය රජ කරන රටක්.

මිත්‍රවරුණි, බස් නැති වුණාම ජනතාව දුක් විඳිනවා මට පේනවා. ඒ වගේම ෆිනෑන්ස් ගෙවාගන්න බැරිව බස් අයිතිකාරයො විඳින දුකත් පේනවා. අනෙක් අතට අඩු පඩියට කට්ට අව්වේ, මොර සූරන වැස්සේ රාජකාරී කරන පොලිස් විරුවොත් අපිට පේනවා. ඒ වගේම නඩු වැඩි වුනාම දුක් විඳින මහේස්ත්‍රාත්වරුත්, නඩු අඩු වුනාම දුක් විඳින පෙරකදෝරුවොත් පේනවා.

මිත්‍රවරුණි, රටක් පාලනය කරනවා කියන්නෙ, මටවත්, මගේ පුතා දහම්ටවත්, මගේ දුව චතුරිකාටවත් ඕන විදියට රට කරන එක නෙවෙයි. මගේ අගසව් රනිල් වික්‍රමසිංහ මහත්තයාවත්, මගේ මාධ්‍ය ප්‍රකාශක රාජිත මහත්තයාවත්, දොළොස් අවුරුදු විශ්ව විද්‍යාල අධ්‍යාපනය අතරමග දමා ආපු චතුරවත් කියන දේ කරන එක නෙවෙයි. මම ඇවිත් ඉන්නේ ජනතාව කියන දේ කරන්න​.
ශ්‍රී ලංකා නිදහස් පක්ෂය බණ්ඩාරනායකලාගෙ පක්ෂය​. එයාලට පිටින් ගියපු අය කරලා තියෙන්නෙ පක්ෂය සහ ප්‍රතිපත්ති හොරකම් කරපු එක​.

ජනතාව අපිව පත් කළේ මොකටද​? ජනතාව අපිව පත් කළේ හොරු අල්ලන්න​. මම දැන් ඒ වැඩේ හෙමින් කරගෙන යනවා. හොරු අල්ලනවා කියන්නෙ සූක්ෂමව කරන්න ඕන දෙයක්. ඒක මේ ආවාට ගියාට කරන්න බෑ. දැන් මම ශ්‍රී ලංකා නිදහස් පක්ෂයේ හොරු ටික හෙමින් සැරේ මාරු කරනවා පොදුජන පොහොට්ටුවට​. ශ්‍රී ලංකා නිදහස් පක්ෂය බණ්ඩාරනායකලාගෙ පක්ෂය​. එයාලට පිටින් ගියපු අය කරලා තියෙන්නෙ පක්ෂය සහ ප්‍රතිපත්ති හොරකම් කරපු එක​. මම ඒ අයට ඉන්න හිටින්න දෙන්නෙ නෑ කියල හිටං මම කියන්න සතුටුයි.

ජනතාවගෙන් මම පොඩි දෙයක් ඉල්ලනවා. මේ කැප කිරීම තව අවුරුද්දක්, නැත්නම් දෙකක්, වැඩිම වුනොත් තුනක් කරන්න වේවි. ඒත් අපි හොරු අල්ලනවා. අල්ලලා රට සංවර්ධනය කරනවා. දැන් බලන්න​, අපි ඉන්දියාව එක්ක එට්කා ගිවිසුම ගැහුවාම මෙහෙ විරැකියාව නැති වෙනවා. මොකද අපේ අයට එහෙ රස්සා කරන්න පුලුවන්. ඇයි ඒ ගැන හිතන්නෙ නැත්තෙ? ට්‍රම්ප් ආවට කමක් නෑ, අපි විදේශ නිදහස් ගිවිසුම් ගහනවා. මොකද මට විශ්වාසයි, මොනවා කිව්වත් ට්‍රම්ප් මම කියන දේ අහනවා. මම ලියන්නත් කළින්, එයා එයාගෙ දෙවනියා, අර පැන්ස මහත්තයාට කිව්ව මට කතා කරන්න කියල හිටං. ඒ තරමට ට්‍රම්ප් මහත්තයා මට සළකන බව මම කියන්න ඕන​.

අන්න ඒ නිසා මම පොඩි කාළයක් ඉල්ලනවා. එතකල් ප්‍රයිවට් බස් ගැන අනුකම්පා කරන්න කියල මම ඉල්ලා සිටිනවා.

මම මේ ප්‍රශ්නය ගැන තනියම තීරණයක් ගන්නේ නැහැ. මම මේ ගැන තීරණයක් ගන්න පාර්ලිමේන්තු කමිටුවක් පත් කරනවා. ඒකට පක්ෂ විපක්ෂ මන්ත්‍රීන් ඔක්කොමල්ලා ඇතුලත් වෙන්න ඕන​. අපි කුමාර වෙල්ගම මහතා වැනි අපේ පක්ෂයේ විපක්ෂ මන්ත්‍රීවරුත් ඒ සඳහා පත් කරනවා.

මම හැමෝටම ආරාධනා කරනවා. පාරෙ බස් නැතුව දුක් විඳිනවාද, මේ ගැන තීරණයක් ගන්නවාද​, කියල හිටං ඔබ තීරණය කරන්න​.

ඔබ සැමට තෙරුවන් සරණයි!

Friday, November 25, 2016

සිංගප්පූරු ගොඩක් ලංකාවේ

ලංකාවේ බලය විමධ්‍යගත කිරීම සඳහා මෙරට දේශපාලන බල අධිකාරිය ක්‍රියාත්මක වීමට බලපා ඇති ප්‍රධානම හේතුව වන්නේ කුඩා ඒකක වශයෙන් රට සංවර්ධනය කිරීම පහසු වීම බව රජයේ ආරංචි මාර්ග සඳහන් කරයි.

ලංකාව සිංගප්පූරුවක් කිරීමේදී මෙහි පාලන ඒකක සිංගප්පූරුව තරමේ ප්‍රමාණවලින් යුක්ත වීම වැදගත් බව මෙම සැලසුම්කරුවන් ගේ විශ්වාසය වේ.



මේ පිළිබඳ රජයේ එක් ආර්ථික උපදේශකයකු සඳහන් කළේ සිංගප්පූරුව දියුණුවට පත් වූයේ එය කුඩා රටක් නිසා බව පෙන්වා දුන්නේය​. එමෙන්ම සිංගප්පූරුවේ මෙන් අදාළ ප්‍රදේශවල ප්‍රධානීන්ට විශාල වැටුප් ද ගෙවීම වැදගත් බව ඔහු සඳහන් කළේය​. එසේ නොමැති වූ කල දූෂණය ඉහළ යන බව ඔහු සඳහන් කළේය​.

මේ අතර මෙම නව සීමා නිර්ණය පිළිබඳ කටයුතු කිරීමට කමිටුවක් විශේෂයෙන් පත්කර තිබේ. සිංගප්පූරුව දළ වශයෙන් කොළඹ දිස්ත්‍රික්කය තරම් විශාල වන හෙයින් ඒ ප්‍රමාණයට පාලන ප්‍රදේශ බෙදීම පිළිබඳව අවධානය යොමු ව ඇත​.

"අපි දකුණේ, අපි මොරටුව​" ආදී වශයෙන් ප්‍රාදේශීයවාදී චින්තනයන් ඔඩු දුවා ඇති රටක මෙය එතරම් දෙයක් නොවන බව කොළඹ විශ්ව විද්‍යාලයේ සමාජ විද්‍යාව පිළිබඳ ජ්‍යේෂ්ඨ කථිකාචාර්ය වරයකු අප සමඟ පැවසීය​.

කෙසේ නමුත් යාල සහ විල්පත්තුව වැනි වනෝද්‍යාන කොළඹ දිස්ත්‍රික්කයට වඩා විශාල වීම හේතුවෙන් එම ප්‍රදේශ බෙදීම පිළිබඳ ගැටලුවක් මතුව ඇත​. එහෙයින් මෙම කමිටුවට විශේෂඥ දැනුම සපයනු වස් විල්පත්තුව පිළිබඳ විශේෂ දැනුමක් ඇති එක් ඇමතිවරයකු ද​, යාල පිළිබඳ මෙන්ම පුරාවිද්‍යාව සහ රැකී රක්ෂා පිළිබඳ ද විශේෂ දැනුමක් ඇති ඇමතිවරයකු ද පත් කර ඇත​

Monday, October 31, 2016

ලංකාවේ ගොන් කරත්ත භාවිතය සීඝ්‍රයෙන් ඉහළට​

මේ දිනවල ලංකාවේ මෝටර් රථ වාහන ගෙන්වීම සීඝ්‍රයෙන් අඩු වෙමින් පවතින බවත් ඊට සාපේක්ෂව ගොන් කරත්ත නිශ්පාදනය සහ ආනයනය ඉහළ ගොස් ඇති බවත් වාර්තා වේ.

පසුගිය දිනවල විවිධ හේතු මත මුස්ලිම් ව්‍යාපාර වර්ජනය කිරීමේ ව්‍යාපාරයක් ක්‍රියාත්මක වූ අතර මෙය හලාල් වර්ජනය සහ සිම් කැඩීම ඔස්සේ ව්‍යාප්ත විය​. අවසානයේදී අති සාර්ථක තත්ත්වයට පැමිණෙමින් මුස්ලිම් රටවලින් එන ඛනිජ තෙල් පවා වර්ජනය කිරීමට ලංකාව කටයුතු කළේය​. ඉන් පසු රුසියාවෙන් ඛනිජ තෙල් ලබා ගැනීමට කළ උත්සාහය ඇමරිකාවේ තදබල විරෝධය මත හකුලා ගැනීමට සිදු වූ බව තතු දත් ආරංචි මාර්ග පවසයි.

මේ අනුව වාහන ගමනාගමනයට විශාල බාධා පැමිණුන අතර පාපැදි සහ ගොන් කරත්ත සඳහා ඇති ඉල්ලුම වැඩි වෙමින් පවතී. මේ අනුව ඛනිජ තෙල් භාවිතය​ සම්පූර්ණයෙන්ම අතහැර දැමීම කෙරෙහි ලංකාවේ අවධානය යොමු ව ඇත​.

එමෙන්ම විදුලි බස්, විදුලි දුම්රිය පිළිබඳ විශේෂ අවධානයක් යොමු ව ඇති අතර ලංකාවේ විදුලි නිශ්පාදනය ඉහළ නංවා ඉන් දියාවට විදුලිය සැපයීම කෙරෙහි අවධානය යොමු ව ඇත​.

එහෙත් තෙල්වලින් දුවන විදුලි බලාගාර ද ක්‍රියා විරහිත වූ තත්ත්වයක එම සැලසුම මඳක් ප්‍රමාද කිරීමට වන බව විශේෂඥයෝ අනතුරු අඟවති.